1st Ladakh Scholar Meet : On 14th December 2022 “International Institute for Culture & Ethics” hosted its first “Ladakh Scholar Meet” to discuss over various matters related to PhD topics in Ladakh, Manuscript Conservation, Promotion of Language and History of Ladakh.
དེ་ཡང་། བོད་ཀྱི་མཁས་པ་དགེ་འདུན་ཆོས་འཕེལ་གྱིས་ཁ་ཆེམས་ཀྱི་ཚུལ་ལ། རོ་དང་འདྲ་བའི་ལུས་པོ་འདི།། ག་དུས་ཤི་ཡང་མི་འགྱོད་དེ།། གསེར་དང་མཚུངས་པའི་རྣམ་དཔྱོད་འདི།། མཉམ་དུ་ཤི་ན་ཤིན་ཏུ་ཕངས།། ཞེས་དམ་པ་ཁོང་ལ་ལྡན་པའི་ཤེས་བྱ་ཡོན་ཏན་རྣམས་སྤྱི་ཚོགས་དང་། མི་མངས་ལ་ཕན་ཐོགས་དེ་ཙམ་མ་བྱུང་བར་ཕངས་སེམས་ཀྱི་སྙིང་གཏམ་གསུངས་པ་ནང་བཞིན།
རང་རེའི་ལ་དྭགས་སུའང། སྲོལ་རྒྱུན་རིག་གནས་ལ་སྦྱངས་པ་མཐར་ཕྱིན་ཞིང། རིག་གཞུང་སྲུང་སྐྱོབ་ཆེད་ཤ་ཞེན་རུས་སུ་ཐིམས་པའི་ན་གཞོན་ཞིབ་འཇུག་པ་དང། མཁས་པ། རྩོམ་པ་པོ། སློབ་དགེ་སྩོགས་ཆེས་མང་ནའང་། སྤྱི་ཚོགས་ནང་འབུར་དུ་ཐོན་པའི་སྐབས་ཉུང་བ་དང་། དམངས་ཚོགས་ནས་དགོས་ངེས་ཀྱི་བརྩི་མཐོང་དང་གུས་ཞབས་དེ་ཙམ་ཡོད་པར་མ་སྣང་བས། རྒྱལ་སྤྱིའི་རིག་གཞུང་དང་བཟང་སྤྱོད་སློབ་གཉེར་ཁང་(iIce) གི་གྲལ་སྒྲིག་འོག་གཞོན་སྐྱེས་མཁས་པ། ཉམས་ཞིབ་པ། རྩོམ་པ་པོ་ཁག་ཅིག་འཛོམས་ར་གཅིག་གི་ནང་དུ་ལྷན་འཛོམ་གྱིས་ཕན་ཚུན་ངོ་སྤྲོད་དང་། ལ་དྭགས་ཀྱི་རིག་གཞུང་ལ་ཞབས་རྟེག་ཞུ་རྒྱུའི་ལས་འཆར་འགའ་གྲོས་མོལ་བྱུང་།།
